Nafarroako Suhiltzaileek 11:50ean jaso zuten sutearen abisua; Eunateko Andre Maria elizatik gertu piztu zela uste dute. Lau helikoptero eta karga hegazkin bat bidali zituzten bertara, bi Nafarroako Gobernuarenak eta beste biak Espainiako Gobernuko Trantsizio Ekologikorako eta Erronka Demografikorako Ministerioarenak. Obanosko igerilekua hustu egin zuten, helikopteroek bertatik ura hartu ahal izateko.
Aurrekariak, gogoan
2022an sute handia izan zen eremu horretan bertan. Hustu egin zituzten Obanos, Legarda, Muruzabal, Belaskoain, Zabaltza, Bidaurreta, Etxarri, Ziritza eta Ubani herriak. Garesko Udalak tokia egokitu zuen herri horietako herritarrei aterpea emateko: Legarda eta Muruzabaletik ebakuatutako herritarrak Garesko frontoira eraman zituzten, baina gero bertatik atera zituzten, sugarrak herrira gerturatzen ari zirelako.
Bigarren sute bat ere izan zen atzo
Artaxoa eta Larrarte artean ere beste su bat piztu zen arratsaldean, laborantza lurretan hori ere, eta NA-6020 eta NA-132 errepideak itxi behar izan zituzten. Iluntzean su hori ere itzaltzea lortu zuten, eta ibilgailuek bertatik igarotzeko baimena lortu zuten berriz.