Nafarroako Unibertsitate Publikoko ikasleek kredituak baliozkotu ahal izanen dituzte boluntario egindako lanengatik. Modu horretan, hezkuntza arautuaren eta ez-arautuaren artean lotuneak sortu nahi dituzte.Lankidetza hitzarmena sinatu zuten atzo NUPek eta Gazteriaren Nafarroako Institutuak boluntariotzan egindako orduak elkartasunarekin lotuak edo kooperazioan emandakoak baliagarriak izan daitezen hezkuntza arautuan kredituak eskuratzeko.
Akordioa Eman kreditua zure elkartasunari programaren esparruan gauzatu da. Ekimen horrek ikaskuntza ez-formala eta gizarte-erantzukizunen, herritarren parte-hartzearen eta gizarte-konpromisoaren balioetan oinarritutako prestakuntza sustatuko ditu. Begoña Alfaro izan zen hitzarmenaren sinadura ekitaldian: "Une hauetan 25 ikasle ari dira Urbasa-Handian ibilbideak eta monumentuak seinaleztatzen eta beste horrenbeste gazte Bera inguruan dabiltza frankismo garaian eraikitako bunkerrak garbitzen eta informazioa eskuratzen". Horiek guztiek egiten dituzten lan horiengatik kredituak baliozkotzeko eskatu dezakete.