Arartekoak Iruñeko Udala premiatu du etxerik gabeko pertsonen errolda agiriak hiru hilabetean ebaztera. Sei hilabeteko epera luzatu zuen azkenaldian Udalak prozesu hori, ikusita, zenbat jende ari zen eskaera egiten. Luzaketa hori bertan behera uzteko gomendatu dio Arartekoak ez direlakoan baldintzak betetzen epe horiek luzagarri egiteko.
Iruñeko Udalak legeari so, sei hilabetera luzatzeko eskatu zuen, ikusita Ekintza Sozialeko alorra gainezka egiten ari zela eta legeak horretarako aukera ematen duela, noiz eta "baliabide guztiak agortzen direnean prestazioa garaiz erresolbitzeko". Arartekoak dio, ez dela nahikoa esatea giza baliabide guztiak eta teknikoak agortu dituztela, izan ere, eskaera handitu dela-eta zer nolako neurri gehigarriak hartu diren ere ezagutu behar direla uste du. Errolda agiria eskatzen ari direnentzako kaltegarria den neurria izanda, ez du ontzat jo epe luzaketa. Bi hilabeteko epea du orain Iruñeko Udalak Arartekoari erantzuteko gomendioa betetzeko asmoa duen edo ez.
Elkarri Laguntza elkartearen salaketa bat dago Arartekoaren gomendioaren atzean. Errolda agirien eskaeretan atzerapenak zeudela ikusirik jarri zuen salaketa, eta jakinarazi zuen 70 herritar daudela ondorioak pairatzen.