Fernando Anbustegi (Baztango alkatea): “Auzolana, oraindik, bizirik dago”

Fernando Anbustegi, Baztango alkatea, Guardasola programan izan dugu.

Baztandarren Biltzarra orain dela 62 urte ospatu zen lehen aldiz eta, geldialdi batzuk tartean, bizirik mantentzen da Baztango hamabost herriak biltzeko eta senidetza ospatzeko eguna. Orgen desfilea jarduera nabarmenetako bat izanik, bestelako ekintzak eta eskaintzak egongo dira; artisautza azoka, mutildantza, bazkari herrikoia eta musika emanaldiak, besteak beste.

Aurten desfilearen abanderatua Aroztegia elkartasun komitea izango da. Urtero elkarte edo ekintza bat omentzen edo eskeintzen diote espazioa eta edizio honetan ,Fernando Anbustegik esan bezala, argi izan dute: “Maiatzean gehiegikeria honen beste atal bat pairatu genuen (zazpi baztandarren kontrako epaiketa) eta igandean berriz ere elkartasun keinu erraldoi bat izanen dugu Elizondon”.

Baztandarren biltzarra auzolanari esker aurrera egin eta bizirik mantentzen da. Hamabost herrietako lagunek hilabete luzez egiten duten lanaren ondorioa da eta Anbustegik honen garrantzia nabarmendu nahi izan du: “Azkeneko urteetan denbora luzez egindako lanaren lekukoa jende gazte askok hartu du eta txalotu beharrekoa da”. 

Ohiko musika emanaldiez gain igande honetan Elizondoko gaztetxean Borla, Lauso eta Pottoka taldeen kontzertuetaz disfrutatzeko aukera egongo da. Zapatillera, Baztango musikazaleen elkarteak , lehen aldiz antolatu ditu.