Bisai talde nafarrak Hemen naiz lehenengo diskoa plazaratu du berriki. Ion Mayordomok, Joseba Alemanek eta Unai Urrozek osatzen dute hirukotea, bere sustraiak Baztanen eta Malerrekan dituen taldea. Ekainaren 5ean plazaratu zuten 11 kantuz osatutako diskoa plataforma guztietan. Taldekideek argitu moduan, "rock suabea edo pop gogorra" bezala definitu daiteke Bisairen soinua.
Lehenengo diskoa norberaren barrenetik egindako bidaia baten moduan ere ulertu daiteke, eta halaxe erakutsi dute ere atzean produkzio lan nabarmena duen hiru ataleko lehenengo bideoklipean. Mayordomok argitu moduan, ia film labur bat ere izan zitekeen bideoko protagonistak onarpen bide bat egiten du, "hainbeste maitatzen ez dituen bere barreneko alderdi horiek besarkatzeko".
Agerraldi batzuk egin ditu Bisaik dagoeneko eszenatokietan, eta datozen hilabeteetarako ere finkatu ditu hitzordu batzuk. Ekainaren 27an Doneztebeko bestetan joko dute Gatiburekin batera, abuztuaren 2an Oñatin ariko dira, hurrengo egunean Beran.
