Memoriarako tresna gisa hain zuzen ere. DNA banku publikoaren zerbitzuak Frankismoaren biktimak identifikatzeko eskaini die Nafarroak gainontzeko erkidegoei.
Nasertic erakunde publikoak kudeatzen du DNA bankua Nafarroako Gobernuaren laguntzarekin batera. Eta, sekuentziazio genetikoaren bidez, deshobiratzeetan aurkitzen diren gorpuzkien identitatea ezagutzeko balio du bankuak. Une honetan, 398 espediente dituzte irekita, 43 identifikazio ahalbidetu dituzte.
Memoria eta Bizikidetza kontseilari Ana Ollok nabarmendu du emaitza onak eman dituela zerbitzuak orain artean eta horiek areagotu egin daitezkeela lankidetzan eginez gero.
Memoria Demokratikoaren Lurralde Kontseiluan mintzatu dira gaiaz, eta bertan, finantzazio banaketa ere egin dute. Nafarroari 115.000 euro inguru egokituko zaizkio aurten, frankismoko biktimak hobietatik ateratzeko, biktima horiek aitortzeko edota balio demokratikoak zabaltzeko ekimenetarako.