Berdinketa ez da emaitza txarra, Benito Villamarin bezalako zelai batean eta denboraldi honetako dinamikak ikusita, baina Osasunak gehiago merezi izan zuen. Orain arte ez bezala, talde gorritxoak partida sendoa egin zuen etxetik kanpo eta Betisi ez zion aukera handiegirik utzi. Hala eta guztiz ere sevillarrak markagailuan aurreratu ziren Cucho Hernandezen golarekin gorritxoak ordea, ez ziren kikildu eta arrapaladan egin zuten aurrera. Budimirren golak berdindu zuen markagailua eta denboraldi honetan gehiegitan errepikatu den atzerapausoa eman ordez, gorritxoek erasoan jarraitu zuten, puntu bat ziurtatuta izan arren. 16 tiro egin zituzten Adrianen ate inguruan horietatik 4 gol aukera garbiak izan ziren. Aimar Orozek, bikote bikaina osatu zuen Bryan Zaragozarekin eta berragertutako izarrak garaipenaren gola oinetan izan zuen, baina atezain sevillarrak gelditu zuen. Berdinketarekin pozik gorritxoak, baina gehiago merezita itzuli dira etxera.
Eta orain atsedenik hartzeko betarik gabe, hurrengo erronkak prestatu behar. Osasunak Europako postuetan sartzeko aukera guztiak mantentzen ditu eta horiek, datozen bi partidak irabaztetik pasatzen dira. Astebetean bi norgehiagoka etxean. Vicente Morenok argi du, Sadarren txanda da orain: “Etxean bi partidu ditugu orain eta Sadar oso zelai zaila da arerioendako, eta bertan jokatuko ditugu Europan jokatzeko aukera guztiak”.
Osasuna hamargarren da sailkapenean 45punturekin, Conference Leaguean aritzeko postuan den Rayo Vallecanok baino bi puntu gutxiago. Hiru jardunaldi geratzen zaizkio aurtengo Ligari, horietatik bi etxean jokatuko dituzte gorritxoek. Ostegunean arratsaldeko zazpietan Osasuna-Atletico eta Igandean, ordu berean, Osasuna-Espanyol. Euskalerria Irratiak zuzenean kontatuko dizue, Osasunaren amets europarra egi bihurtzen den ala ez.