UPNren salaketak batek jarri du Auzitegi Nazionala Ernaik antolatua zuen ekitaldia zelatatzera. Horrek ez die segurtasun bermerik ematen gazteei eta erabaki dute manifestazio batekin erantzutea: Apirilaren 17an Berriozarren eginen dute protesta eskuin erreakzionarioak jarritako debeku eta oztopoei. 18:00etan Oztopoen gainetik askatasunera leloarekin aterako dira kalera.
Apirilaren 17tik 19ra Gazteon Eskutik topagunea eginen du Ernaik Berriozarren eta asmoa zuten Preso Politikoen Nazioarteko egunean, apirilaren 17an, ekitaldi politikoa egiteko. Ez dute halakorik eginen zelatatzeko mehatxua dutelako bizkar gainean eta ez dagoelako bermerik askatasunez aritzeko, esan dute. Isilik ere ez direla geratuko jakinarazi dute eta horregatik dei egin dute prestatutako manifestazioan parte hartzera.
