Apirilaren 20an Aberri Eguna Iruñean ospatzeko antolatu duen egitaraua aurkeztu du astearte honetan EH Bilduk. Bertan, "Euskal Herria sustrai bakezale sakonak dituen nazioa" dela eta "izaera politikoa duen edozein gatazka konpontzeko elkarrizketaren eta bide diplomatikoen aldeko apustua" egiten duela aldarrikatuko du.
Aberri Eguna, 'Askatasunaren nazioa gara' lelopean, 12:00etan Golem zinemetatik egingo den manifestazio batekin hasiko da. Martxaren ostean ekitaldi politiko bat izango da, eta, ondoren, haurrentzako hainbat musika jarduera izango dira Iruñeko hainbat tokitan, EH Bilduk "euskal nazioaren hiriburu" gisa nabarmendu dituenak.
"Apirilaren 20an, ezkerreko milaka abertzale eta subiranista bilduko gara Iruñean, Aberri Eguna ospatzeko eta askatasunean bizi nahi duen nazio bat garela aldarrikatzeko", adierazi dute Irati Jimenez EH Bilduko parlamentariak eta Xabi Ruiz de Larramendi Gasteizko zinegotziak. “2025ean 50 urte beteko dira Txiki eta Otaegi hil zituztenetik, eta 39 urte erreferendumean euskal herritarrek NATOri 'ez' bozkatu ziotela 2025 honetan, euskal ezkerreko subiranistek argi eta garbi esango dugu Iruñean nazio bat garela. Euskal Herriak munduko elite handiek inposatzen diguten bide alternatiboa eraikitzen jarraitu nahi duela, bide antiinperialista, antimilitarista, feminista eta euskalduna. 2025eko Aberri Egunak herri aske bat garela aldarrikatzeko balioko du ", azpimarratu dute.
Egun osoko egitaraua
Aberri Egun guztietan bezala, Golem zinemetatik eguerdiko 12:00etan abiatuko den eta ekitaldi politiko batekin amaituko den manifestazio batekin hasiko da. Aldarrikapen martxaren ondoren, aisialdirako unea iritsiko da, adin guztientzako eskaintzarekin. 13:15etatik aurrera, eta Basotxotik abiatuta, trikitilari, gaitari eta erraldoiekin, Kuxkutu txarangarekin eta munduko dantzekin kaleko animazioa izango da, hiriko kalerik giroenetara joango dira manifestazioko partaideekin batera. Era berean, Malatxo txaranga Jarauta kalera zuzenduko da gazteei gazte gunera laguntzeko.
Gazteluko plaza izango da jaiaren epizentroa Aberri Egun honetan. Arratsaldeko 16:00etatik aurrera, izen handiko euskal taldeen kontzertuak izango dira bertan: Izaki Gardenak, Belako eta Trikidantz.
Etxeko txikienek, bestalde, Burgoen plazan izango dute beren gunea, haurrentzako jolasak eta ‘Ai, Zapotxin! Baratxuri zoparen sekretua’ kale antzerkiarekin.
