Raimundo el Canastero taldea ez dute bide penaletik epaituko iazko Lizarrako jaien eztabaiden kontura, alkateari egindako Beef d 'Alda abestiarengatik. Nafarroako Auzitegiak errefusatu du UPNk eta Marta Ruiz de Alda alkateak taldea gorroto delitua egotzita epaitzeko asmoa; auzitegiak ebatzi du epez kanpo dagoela.
Hartara, auzia Lizarrako epaitegira itzuli du eta bertan delitu arinen epaiketa egingo dute. Gehienez hiru hilabeteko isunarekin zigortu ahalko zaie bertan, eta delitu arina denez, epaiketa egin arte ez da jakingo zein den egindako akusazioa.
Inplikatuek hala onartu zuten hasieratik eta alkateak ez zuen errekurtsorik aurkeztu. Gerora, urtarrilaren amaieran, Ruiz de Aldaren eskaerak epaiketa atzerarazi zuen, akusazio larriagoak egotzita. Prozesua beste maila batera igotzeko gorroto delitutzat epaitzea eta espetxe-zigorra jaso ahal izatea proposatzen zuen alkateak.
Baina, auzitegiak ebatzi du aurretik egin behar zutela eskaera hori dagokion erreforma-errekurtsoa eta apelazio-errekurtsoa jarrita. Beraz, bertan behera geratzen da eskaera eta Raimundo el Canasterok ez du espetxe zigorrik jasoko.
