NAPAR-ek, Nafarroako ikus-entzunezkoen ekoizle eta profesionalen elkarteak, Napardocs-en zortzigarren edizioa antolatu du Punto de Vista Nafarroako Zinema Dokumentaleko Nazioarteko Jaialdiaren baitan. Goizean zehar egin diren mahai-inguruen bitartez zinema ekoizpenaren, banaketaren eta sorkuntzaren inguruan aritu da aditu sorta bat.
Elkarteko idazkari Ander Zugazak azaldu bezala, ikus-entzunezko edukiak sortzen dituzten Nafarroako profesional eta enpresa guztiak biltzen ditu NAPAR-ek, "sektorearen hazkundeari laguntzeko asmoz, proiektu berriak babestuz eta jarduera hori industria eta sormen-sarean sustraituz". 43 bazkidek osatzen dute eta Nafarroako Ikus-entzunezkoen Klusterreko kidea da.
