TCC enpresako langileen ordezkariek deitu dute lanuztea egitera, lan-hitzarmenaren negoziazioa etenda dagoela salatzeko eta beharrezkoa dutelako euren lan baldintzak duinduko dituen ituna adostea. Langileek beste eskaera batzuk ere badituzte, atzetik datozenak: "bilgailuen mantenimendu lana egoki egitea, egun, ez direlako egiten ari eta autobus askok dituztelako gabeziak, eta bestetik, langileek komun zerbitzuak izatea", esan du Ilargi Angulo LAB sindikatuko kideak.
"Ez bada aurrera egiterik lortzen, ostegunean ere lanuzteak eginen ditugu eta datozen asteetan ere ildo bera segituko dugu: astearte eta ostegunetan geldialdiak egiten", azaldu du Angulok. Horrez gain, bihar, elkarretaratzea eginen dute Iruñerriko Mankomunitatearen egoitzaren parean.
Istiluak poliziarekin
Goizeko lehen orduan istiluak sortu dira billabesak gordetzen dituzten eremuan Espainiako polizia agertu baita: "Oso jarrera kaxkarra eta itsusia izan dute langileekin. Hamar bat lagun identifikatu dituzte", jakinarazi du Angulok.
Iruñerriko Mankomunitateak ohar baten bidez jakinarazi du atzerapenak zerbitzuetan orokortuak izan direla eta normaltasuna goizeko bederatzietatik hamarretara itzuliko dela.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!