Hezkuntza arloko gehiengo sindikalak ez du amorerik eman nahi eta ikasturte berean hiru greba egin eta gero, orain lanuzteak eginen dituzte eskualdez eskualde, irakasleen nekea eta haserrea erakusteko. “Hezkuntza publikoaren alde – Muévete por la pública” lelopean hurrengo asteetan, asteazkenero lanuzteetara deituko dituzte irakasleak goizeko bederatzietatik hamaiketara. Protesta eskualdeka eginen dute eta sindikatuek irakasle batzarrak egiteko probestuko dute.
“Hezkuntza publikoak dituen beharrak eta behar dituen soluzioak denon artean zehazteko bilduko gara” adierazi dute. Horretarako inbertsioak beharrezkoak dira eta sindikatuek ez dute onartzen hezkuntza departamentuak jarritako aurrekontuen mugen aitzakia. “Aurrekontuak urtero negoziatu behar dira, beraz aurtengoetan ezin bada hurrengo urtetakoetan posible dute beharrezkoak diren diru partidak zehaztea” azaldu dute.
Hau izanen da lanuzte, elkarretaratze eta asanbladen egutegia:
- Otsailak 19: Baztan-Bidasoa
- Otsailak 26: Lizarraldea
- Martxoak 12: Sakana, Larraun eta Leitzaldea
- Martxoak 19: Zangozaldea eta Pirineoak
- Martxoak 26: Erribera
- Apirilak 2: Tafallaldea
- Apirilak 9: Iruñerria
