Vicente Morenoren Osasunak zazpi jardunaldi daramatza jarraian garaipenik lortu gabe. Entrenatzaile valentziarrak aldaketak egin zituen bai eskeman, baita hasierako hamaikakoan ere. Dena aldatu zuen, emaitza izan ezik.
Morenok apustu ausarta egin zuen, osteguneko Athleticen aurkako Kopako kanporaketa buruan. Ligan pisu handia izan ohi duten jokalari ugari aulkian utzi zituen, eta Ruben Peña, Pablo Ibañez, Moi Gomez eta Raul Garcia hasieratik zelairatu.
Hiru erdiko atzelarirekin, taldeak lehen zati serioa egin zuen, ongi eutsiz talde madrildarraren erasoko jokoari. Ongi aritu zen, bigarren zatian, 55. minutuan, gaizki defendaturiko korner batean, Julian Alvarezek gola sartu zuen arte.
Hortik aurrera, gorritxoen jokoa sortzeko zailtasunak oso agerian geratu ziren. Atletiren defentsa sendoaren aitzinean, ezintasun kamutsa. Azkenean, lehen mailako liderraren kontra porrot duina, baina porrota.
Edonola ere, Osasunak lehen itzulia itxi zuen atzo, eta 2019an Lehen Mailara itzuli zenetik bigarren onena da.
