Andrea Lusarreta Monrealek 28 urte ditu, Kirol eta Jarduera Fisiko Zientzietan graduatua da, eta azken bost urteotan Zizur Nagusiko Kirol koordinatzailea izan da.
Kudeaketan ez ezik pilotalekuan ere badu eskarmenturik. Atarrabian, esku pilotan jokatu zuen, eta hortik goma paletara pasa zen. Horretan, maila altuagoan jardun izan da, Oberena, Pilotajauku eta Gure Pilota taldeetan. Denboraldi honetan, goma paletan, txapelduna izan da, binaka. Horretaz gain, Nafarroako hautatzailea ere izan da, goma trinkoan.
Beraz, bistan da ederki ezagutzen duela pilota, oro har, eta Nafarroako Federazioa, bereziki.
Lusarreta atzo eguerdian jabetu zen karguaz, Javier Conde presidente ohiaren eskutik. Ez da bozketarik izan, Lusarreta izan delako lekukoa hartzeko hautagai bakarra.
