Osasunari berehala jarri zitzaion maldan gora euskal derbia, Kike Garciak Sadarreko historiako golik goiztiarrena sartu baitzuen Alavesentzat, 37. segundoan. Gorritxoei kosta egin zitzaien kolpe horren ondotik berpiztea. Min harturiko Bryan Zaragozaren ordez ezker hegalean Abel Bretones atzelaria erdilari lanetan jartzeak ez zuen lagundu.
Halako batean, korner batean, Alaveseko Mourinhok Osasunako Budimir elastikotik nabarmen heldu zuen, area barruan. VARetik Soto Grado epailea deitu zuten, baina penaltirik ez zela izan ebatzi zuen, aurretik Catenak Mourinhori ustez egindako blokeo bategatik.
Bigarren zatian aldaketa garrantzitsua egin zuen Vicente Morenok: Juan Cruz kanpora, Raul Garcia zelaira bigarren aurrelari moduan, eta Bretones defentsara. Osasunaren jokoa nabarmen hobetu zen, eta taldeak bi gol egin zituen oso denbora gutxian: Budimirren denboraldiko hamargarrena, geldikako jokaldi katramilatsu batean area txikiaren barrutik egindako errematean, eta Ruben Garciaren beste bat, falta batean, karanbola txiki baten laguntzaz.
Eromena Sadarreko harmailetan, bi gizonek festa zapuztu zuten arte: batetik, Kike Garcia gorritxo ohiak babazorroen bigarrena egin zuen kontraeraso batean; bestetik, Sivera atezainak behin eta berriz ekidin zuen gorritxoen hirugarrena, meritu handiko geldiketen bitartez.
Hartara, bigarren zatiko azken txanpa bikainean ezin konpondu lehen zati hasiera pattal batean hautsitakoa.
