Villarreal bezalako talde baten aurka punturen bat lortzea beti ontzat jo beharko luke Osasunak. Baina Villarrealek berdinketaren gola 92. minutuan eta penalti eztabaidatu baten bitartez egiten badu, balorazio positibo horri eustea ez da erraza osasunazalearentzat.
Klasikoek lioketen moduan, norgehiagokak bi zati eduk zituen, lehena eta bigarrena. Erran nahi baita biak oso ezberdinak izan zirela.
Lehenean, Osasuna nagusi izan zen, joko zuzen eta eraginkorra eginda. Budimirrek bi gol sartu zituen, biotako bat beste penalti eztabaidatu bati esker.
Bigarren zatian, ordea, Marcelinok Gerard Romero zelairatu zuen, eta horrek norgehiagoka errotik aldatu zuen. Urpekontzi Horiaren torpedoak gero eta sarriago hurbildu ziren Sergio Herreraren atera. Eta azkenean gertatu zitekeena gertatu zen: Villarrealek berdinketa erdietsi zuen.
Vicente Morenok zer aztertua eta hausnartua ematen duen erabakia hartu zuen: Aresori agindu zion Baenari buruz-buruko markaketa egiteko, zelai osoan zehar. Horrek desoreka handixkoak eragin zituen gorritxoen defentsa sisteman.
Hurrengo norgehiagoka abenduaren bian, astelehenarekin jokatuko dute gorritxoek, Sanchez Pizjuan futbol zelaian, Sevillaren aurka.
