Maddalen, Maitane eta Ziortzak kolore askotako harri distiratsu bat topatu dute. Gizon eta emakume bat jarraika hasiko zaizkie harribitxia dela eta. Zergatik? Tartean, Owenek, Bretainiatik oporrak pasatzera etorritako bizilagunak lagunduko ditu. Berak ez daki euskaraz. Bretoieraz hitz egiten du. Nola hitz egin harekin? Nola komunikatu? Harriak misterio bat gordetzen du bere baitan eta haien bizitza arriskuan jarriko du.
Hauxe da Iñigo Ibarrak (Iruñea, 1974) idatzi duen azken eleberriak dakarren istorioa. 10 eta 12 urte bitarteko gazteei zuzenduta, fantasiaz baliatu da, beste behin, aipatu nahi izan dituen gaiak jorratzeko. Fantasia, izan ere, bada tresna erabilgarria garaikideak diren gaietaz mintzatzeko. Liburua labetik atera berri da eta dagoeneko liburu-dendetan aurkitu daiteke.
