"Irabazi asmoak lehentasun izan baino, pertsonak, ingurumena eta gizartea kontuan hartzen dituen sarea da errotzen ari dena", esan du June San Millan REASeko kideak. 2018tik egiten dute erakunde horiek kontu-ikuskaritza soziala eta aurten 41 entitaterena ezagutarazi dute. "Sarean egiten dute lan, kontsumo arduratsua bultzatzen dute, finantza etikoekin aritzen dira eta kalitatea bultzatzen dute", azaldu du San Millanek. Zerbitzuak eta produktuak dituzte aukeran. Eraikuntzatik hasi, elikagai ekologikoetatik pasa eta energia berriztagarrienetara iritsi arte. Denetik.
"Gardentasuna ere bada berain beste bertuteetako bat. Entitate bakoitzak alor ekonomikoan izan dituen sartu-irtenak eta egin dituen bestelako ekintzen berri ematen du", adierazi du. Errotzen ari den sektorea dela uste du San Millanek eta gero eta garrantzia handiagoa hartzen ari dena. REASen parte diren entitateen artetik 41ek egin dute aurtengo kontu-ikuskaritza sozialaren lana eta guztiei eman diete gaur bereizgarri bat.
