Comisiones Obreras sindikatua kexu agertu da Nafarroako Gobernua hartzen ari den jarrerarekin negoziazio mahaietan. EH Bilduren "azken hitzaren menpe" daudela iruditzen zaio sindikatuari Mahai Orokorrean Administrazioko Langileen Estatutuen gaineko negoziaketa adibidez. "Onartezina" iruditzen zaio sindikatuei gaitasuna kentzen dielako: "Mahaietan adosten dena baldintzatua dago langileen ordezkari ez den EH Bildurengandik", salatu du CCOOko David Markalainek.
"Osasun sistema pribatizatzera daraman gobernua" izanen dela gaineratu du Comisiones Obreras sindikatuko Victoria Astrain osasun arloko ordezkariak. "Osasun Legeak jasotzen duenaren arabera, osasun arretak ez du zertan ziurtatua egon funtzionarioa den lan-taldearen bitartez, eta horrek prekarizazioari ateak zabaltzen dizkio", salatu du Astrainek. Lan baldintzak erregulaziotik kanpo geratuko direla ere kritikatu du. Osasun Legeak gainera finantzazio-kudeaketarako autonomia izanen duen entitate publikoa sortzeko aukera jasotzen du egungo Erakunde Autonomoa ordezkatuko lukeena: "Osasuna pribatizatzera eta azpikontratatzera darama horrek", jakinarazi du. Gainera, gizarteko sektorerik zaurgarrienak kaltetuko lituzketela uste dute sindikatuan.
Bi greba egun, eta ezerezean
Hezkuntzari dagokionez, noraezean ikusten dute departamentua: "Proiektu pilotuak egiten ari dira inolako kontrol eta aurreikuspenik gabe, haur eskoletako langileei ez diete lan baldintzak hobetuko dizkien proposamenik egiten eta gainerako irakasleen bi greba egunen ondotik ere oraindik ez da gai izan zazpi sindikatuek eskatzen dizkietenak eskaintzeko", azaldu du Unai Alaba CCOOko hezkuntza alorreko kideak. Atzo batzartu ziren hezkuntza publikoko sindikatu guztietako ordezkariak eta kontseilariari igorriko dioten proposamenak jasoko dituen dokumentua prestatzen ari direla azaldu dute.
Gauzak horrela, Nafarroako Gobernuari eskatu diote ongizatea ziurtatuko duen politikak egiteko, Osasun Legearen xedapen gehigarria erretiratzeko, negoziazio mahaian hartzen diren akordioak errespetatzeko eta lan baldintzak zein zerbitzuaren kalitatea errespetatuz zerbitzu publikoak indartzeko.
