LAB sindikatuak berriki jakin du Guardia Zibilak Nafarroako Gobernuaren Ikasnova hezkuntza plataforma digitala erabili duela jakinarazi du LABek. Plataforma DBHko 4. mailako ikasleak indar militarrak antolatutako zibersegurtasunaren inguruko lehiaketa batera erakartzeko erabili duela salatu du sindikatuak. Eta gaineratu du, “ziurrenik, Hezkuntza Departamentuarekin elkarlanean” izan dela.
“Desegokia eta guztiz salagarria” da Guardia Zibilak ikasleen ikasketa prozesuan parte hartzea. Foru Gobernuko Hezkuntza Departamentuak kudeatzen duen plataforma digitala da Ikasnova eta horren bitartez iritsi da Guardia Zibilaren egitasmoa Nafarroako Bigarren Hezkuntzako ikastetxe publiko zein itunpeko guztietara.
DBH 4. mailako ikasleek jaso dute egitasmoaren berri eta lehiaketaren azken fasea, Aranjuezen, guardia zibilen akademian, jokatzen dela kritikatu du LABek. Irmoki gaitzetsi dute gertatutakoa eta hezkuntza komunitateari dei egiten diote halakoetan kolaboratu ez dezan.
LAB sindikatuaren iritziz, lekuz kanpo dago erabat Nafarroako ikastetxeek Hezkuntza Departamentutik jaso duten proposamen hau eta Carlos Gimenok zuzentzen duen sailari exijitzen dio berriz halakorik zabal ez dezan, ikasgeletan ez baitago Guardia Zibilaren batere beharrik.
Zuritzeko saiakera
Euskal Herrian Guardia Zibilaren jarduna eta presentzia “zuritzeko enegarren saiakera da lehiaketa hau” sindikatuaren aburuz. Guardia Zibilak Nafarroako hezkuntza komunitateko ehunka kideren aurka egin izan dituen ekintzak ekarri ditu gogora LABek. Esaterako, “irakasleak bere joera politiko edo ideologikoen arabera bere garaian sortu zituen zerrenda beltzak” aipatu ditu sindikatuak.
Hezkuntza Departamentuari “dei garbi eta ozena” egin nahi dio LABek “balio atzerakoiak” defendatzen dituen eta “Nafarroako irakasle zein ikasleak erreprimitzen eta kriminalizatzen ibili den erakunde militar horren ekimenekin kolaboratu ez dezala”.
