Hogei eskubidez osatutako adierazpena landu dute Nafarroako LGTBI kolektiboek. Arartekoari, udalei eta beste administrazio politiko batzuei helarazi diete dokumentua. Trans pertsona guztiek legearen babesa izateko eskubidea dutela aldarrikatu dute eta tratu zuzena eta errespetuzkoa jasotzea eskatu dute.
Transen eskubideak – Giza eskubideak izenpean sortu dute adierazpena, izan ere trans pertsonei zis guztiei dagozkien eskubide guztiak dagozkie eta hartara, legearen babes bera merezi eta behar dute. Kolektiboko kide ororen aurkako bazterkeria eta erasoak salatu dituzte eta horretarako sortutako dokumentuan hainbat irizpide izan dituzte aintzat.
Lan eremuari dagokionez, gobernuek trans pertsonak kontratatzen dituzten enpresentzat onura fiskalak ezartzea galdegin dute, eta lan esparruan ere LGTBI errealitateekiko sentsibilitatea azpimarratu dute, prestakuntza ikastaroak txertatuz.
Osasungintzari dagokionez, nabarmendu dute pertsona transek arreta eta hormona tratamendua osasun sistema publikoan jasotzeko eskubidea dutela eta baita edozein ebakuntza kirurgiko egiteko ere. Ez da patologia bat eta tratu zuzena eta errespetuzkoa jasotzeko eskubidea bermatzea nahi dute.
Nazioarteko eskubideak ere aitortu behar zaizkiela adierazi dute, besteak beste, laguntza soziala eskatzeko edota asiloa eskatzeko. Datorren asteazkenean, urriaren 23an Transexualitatearen Despatologizazio Eguna aldarrikatu dute.
