Espainiako Gobernuak ez ditu desklasifikatuko Mikel Zabalzaren auziaren inguruko agiriak. Ez, behintzat, epe motzean. Espainiako Presidentetza eta Justizia ministro Felix Bolañosek ezezkoa argudiatzeko tenorean behin eta berriz aipatu du “segurtasun nazionala”, horren eta Zabalza auziaren arteko lotura azaldu gabe.
Bolañosen arabera, PSOEren gobernua sekretupeko ezein agiri desklasifikatzeko prest dago, baina soilik baldin eta hiru baldintza betetzen badira: Justiziak eskatzea, Gorteetako ikerketa batzorde batek galdegitea eta balizko desklasifikazioak eraginik ez edukitzea segurtasun nazionalean.
Barkos senatariak sekretu ofizialen legearen jatorri frankista oroitarazi dio Bolañosi. “Halako erabaki bat ezin da hartu lege frankista baten arabera”. Geroa Baiko eledunaren arabera, “egun Kongresuan dagoen gehiengoak bideragarri egiten du lege horren erreforma” eta aldaketa hori beharrezkoa da “biktima guztiei begi berberekin begiratzeko”; izan ere, “zenbait biktimari oinarri-oinarrizkoak diren egia, justizia eta erreparazioa ukatzen zaie”.
