Hamahiru saio izan dira Nafarroako Taldekako Bertsolari Txapelketako lehen fasean eta argitu da dagoeneko zeintzuk diren finalaurrekoetara sailkatutako taldeak.
Asteburuan jokatu ziren lehen faseko azken sei saioak, Iruñean, Erronkarin, Eugin, Atarrabian, Leitzan eta Erratzun. Eta, ondoko sei taldeak dira fasez pasa direnak: 'Manteleko sobrak' (Leitza-Altsasu-Barañain), 'Baztanzopak' (Baztan), 'Argako Bixiguak' (Atarrabia-Barañain), 'Mutilatuak' (Bortziriak-Baztan), 'Hor gu!' (Bortziriak) eta 'EzKrashak' (Iruñerria).
Ostiralelan, urriaren 4an, abiatuko da finalaurrekoetako fasea. Sei saio eta hiru kanporaketa izango dira finalaurrekoetan, joan-itzuliko formatuan. Ostiralean hiru saio izanen dira. Irurtzunen ‘Argako Bixiguak’ eta ‘Mutilatuak’ izango dira Pikuxar Elkartean; ‘Manteleko sobrak’ eta ‘Baztanzopak’ Tafallan ibiliko dira, El Aguazon peñan; eta Iruñean Aldapa peñan ‘Hor gu!’ eta ‘Ezkrasak’.
Astebete barru, 12an, plazaz aldatuko dira taldeak eta itzulerako saioa jokatuko dute Etxaurin, Irunberrin eta Tuteran.
