“Bidegabekeria egoera batean neutral azaltzea, erasotzailearen alde egitea da” Desmond Tuttu Nobel sariaren hitzak gogoan, kalera ateratzera deitu dute gizarte eragileek Palestinarekin elkartasunean. “Palestinak inoiz baino gehiago behar gaitu, ez bizkarra eman” adierazi dute, “Zatoz manifestaziora, protesta egin, galdegin, Palestinaren alde, Nafarroaren alde, mundu justuago baten alde”.
Datuak eman dituzte manifestazioaren deitzaileek, protestarekin bat egiteko. “Urtebetean, azken lau urtetan mundu osoan izan diren gerra guztietan baino haur gehiago hil ditu Israelek. Urtebetean, Israelek bonba gehiago jaurti ditu Gazara, Bigarren Mundu Gerran Londres, Dresde eta Hiroshimara botatakoak baino. Israelek osasun azpiegitura eta hezkuntza azpiegituren %75a suntsitu ditu”. Gogoratu dute, pasa den urteko urrian hasitako oldarraldia ez zela izan Israelen basakerien lehen kapituloa. “Sionismoak 76 urte daramatza palestinarrak etxetik botatzen, lurrak lapurtzen, landa soroak suntsitzen, haurrak, helduak eta adinekoak espetxeratzen”.
Manifestazioa datorren urriaren 5ean, arratsaldeko 18.00ean abiatuko da Iruñeko Golem zinemetatik.
