Herriko errealitate soziolinguistikoa kontuan hartuta eta aintzat hartuta hizkuntza ofizial bakarra gaztelania dela Azkoienen UPNk ez du ulertzen herriko karteldegian alkateak egin nahi duen aldaketa. “Azkoiengo herritarrentzat lehentasun ez diren ekimenetarako diruaren erabilera egitea ez da egokia”, adierazi zuen herriko alderdi erregionalistako ordezkariak. Horrekin batera, herrian bestelako “hutsuneak” daudela gogorarazi diote alkateari, hala nola: mediku falta, erizainena, pediatrarena edota garraiobideetan. Alkateak, Juan Carlos Castillok, erantzun dio UPNri: “Ez da inolako txostenik behar, fiskalizazioarena litzateke bakarra eta hori onartua dago eta UPNk badu”. Alkateak “badaki” zein den herriaren errealitate soziolinguistikoa; gaztelania da nagusi, baina euskara dakiten herritarrak eta euskara ikasten ari direnak ere badira, tartean, haurrak.
Gainerako gaien inguruan ere erantzun egin dio UPNri: “Gobernuarekin harremanetan gaude osasun profesional faltaren eta garraiobideen gutxitasunen inguruan, hura baita eskumena duena”.
