Klasikoek lioketen moduan, partiduak bi zati eduki zituen, lehendabizikoa eta bigarrena. Erran nahi baita bata eta bestea oso desberdinak izan zirela.
Lehendabizikoan, Osasuna gehiago izan zen Rayo baino. Gorritxoak kementsu eta txukun aritu ziren. 29. minutuan, Moi Gomezek gol dotorea egin zuen, Ruben Garciarekin bat bikoa egin eta gero. Garciak eta Aresok lehen zati bikaina egin zuten, eskuin hegaletik.
Alta, bigarren zatian Arrasateren mutilak intentsitatea galdu zuten, eta jaitsiera saihesteko puntu premia zuten Iñigo Perezenak lehia guztietan gailentzen hasi ziren, eta partidua luzea egin zitzaien gorritxoei.
Lau minutu aski izan zitzaizkien emaitzari buelta emateko, urrutiko bi jaurtiketa zitalen bitartez. 80. minutuan, Chavarriaren gola. 84.ean, Isirena. Eta hiru puntuak Vallecasko Fofo pailazoaren kalean geratu ziren..
Hori gutxi balitz, David Garcia lesionatu egin zen, eskuin izterreko atzealdean gihar arazoekin. Osasunak Granadaren aurka jokatuko du Ligako hurrengo partida, igandean, arratsaldeko lauak eta laurdenetan, Los Carmenes futbol zelaian.
