Haur eta Lehen Hezkuntzako aurrematrikula gaur abiatuko da, eta, ostirala bitartean, Nafarroako 3 urteko haurren 5.200 familiek aukeratuko dute 3 urteko seme-alabentzako ikastetxea. Eskaerak telematikoki egingo dira Hezkuntzak horretarako garatu duen web-aplikazioaren bidez, baina, hala ere, eskabidean adierazitako edozein zentrotan ere aurkeztu ahal izango dira eskaerak.
Familia bakoitzak gehienez 6 zentro markatu ahalko ditu eta onartutakoen behin-behineko zerrenda apirilaren 25ean argitaratuko da. Ohi bezala, matrikula egiteko epea ekainaren 17tik 21era izango da. Puntuen araberako baremoa aplikatuko dute zentroa esleitzeko eta horrek ere markatuko du itxarote-zerrendaren ordena.
Hezkuntza Departamentuak jakinarazi duenez, azken urteotan, jaiotza-tasaren beherakadaren ondorioz, familia ia guztiek plaza lortu dute haien lehen-aukeran. Eta bestalde, aniztasunarekiko arreta hobetzeko asmoz, Haur Hezkuntzako geletan, ikasle kalteberenen bolumen handiena duten ikastetxeetan ratioak murriztuko dituzte.
