Kalitateak erabaki zuen atzoko euskal derbia. Erran nahi baita Osasunak eta Alavesek oso euskal derbi orekatua jokatu zutela, eta super heroi maskaratu batek, Ante Budimirrek, area ertzetik lorturiko gol bikain baten bitartez, desorekatu zuela markagailua gorritxoen alde.
Norgehiagokak hainbat albiste on utzi zituen. Konparaziora, Herrandoren erakustaldia defentsaren erdian. Edo Moncayolaren eta Torroren itzulera, lehiakortasun maila onera.
Alta, halaber bi berri txar ere utzi zituen. David Garciaren eta Kike Barjaren leisoak. Noaingo hegalekoarena, gainera, larria izan liteke. Osasunak larunbatean jokatuko du Ligako hurrengo norgehiagoka, gaueko bederatzietan, Gironaren aurka, Montilivi futbol zelaian.
