Sindikatuen kontaketaren arabera, azken hamar urteotan 150 hildako izan ziren lanpostuetan, horietatik 12, iaz. Joerak berdin segitzen duela salatu dute LAB, CGT, ESK, Steilas, EHNE-Etxalde eta Hiru sindikatuek: "Kontuan hartuta aurtengo urtarrilean 5 heriotza izan direla argi ikusten da ez dela esku hartu datu horiek iraultzeko", esan du Hiru sindikatuko Jon Altunak. Datu ofizialetan hildako gutxiago eta bestelako eraginak dituzten istripu gutxiago jasoak daude: "Lanera bidean edo lanean autoan izandakoak ere ez dituzte lan istriputzat hartzen". Basogintzan, eraikuntzan, industrian edota garraioan arriskua handiagoa dela jakinarazi dute, beste sektore batzuetan errazagoa da gaixotasun profesionalak garatzea. "Arazo mentalekin gero eta langile gehiago dago, bereziki, emakumeak. Karga metal handiagoa duten lanpostuetan atzematen ari dira hazkundea", adierazi du.
"Nafarroan gertatzen denak baditu erantzuleak: prekarietatea batetik, eta patronalaren utzikeria bestetik", nabarmendu du Altunak. Patrobalak ez duela bere lana egiten eta inork ez duela betearaztera behartzen uste dute sindikatuek. Hagatik, "ikuskariak biderkatzeko" beharra dagoela eta Lan Osasunak arautegia "betetzen dela ziurtatzea" ezinbestekoa dela iruditzen zaie.
