Bi minutuan, Celtak Osasunaren atzealdearen ahuldadea krudelki utzi zuen agerian. 120 segundoan, talde galiziarrak bi gol erdietsi zituen, Catena eta David Garcia erdiko atzelarien sasoi kezkagarria lagun.
Itxaro Borda parafraseatuz, bi minutuan, herrimina. Zentzu literalean: bi golok min handia egin zioten osasunazaleek osatzen duten komunitateari, herriari. Eta figuratuan: osasunazaleok taldearen garai bateko defentsa sendoaren nostalgia sentitu zuen.
Aurretik, Ante Budimirrek gol egiteko abagune argia eduki zuen, baina ez zuen profitatu. Ondoren, Osasunak bigarren zati osoa aurkariaren zelaian jokatu zuen, baina txinpartarik gabe, kamuts. Partiduaren azken txanpan, Celtak hirugarrena egin zuen, atera egindako hirugarren jaurtiketan, kasik.
Defentsa sendo batekin eta erasoan apenas deus egin gabe eraman zituen Celtak hiru puntuak. Gakoa: atzo Sadarren ikusitakoa estropezua ala joera den.
Indar Gorri peñako kideak partidua hasi eta hamaika minutura sartu ziren harmailetara, haien hamaika kidek ebakuazio bideak estaltzeagatik jasotako zigorrak salatzeko.
Larunbatean, Osasunak euskal derbia jokatuko du Realaren kontra, Anoetan, 15:15ean.