Pena eta penaltia aliterazioak laburbil dezake bart gaueko norgehiagoka: pena, Osasuna Kopatik at geratu delako, partidu txukuna eginda. Eta penaltia, Hernandez Hernandez arbitroaren erabakiek guztiz baldintzatu zutelako kanporaketa.
Bigarren minutuan ez zuen argi ikusi Budimirri area barruan egin zioten falta; 57.ean, aldiz, klarki ikusi zuen penaltia eta txartel gorria, Catenaren sarrera batean, eta Oiartzabalek zero eta batekoa egin zuen. Gol aukera gutxiko norgehiagokan, erabakiok erabakigarriak suertatu ziren.
Edonola ere, Osasunak sendotasunez egin zion aurre Realari, bost jokalariz osaturiko defentsarekin, eta hamar gizonekin ere lan txukuna egin zuen. Aipagarriak bai Moncayolaren erakustaldi batez ere fisikoa, eta baita Arnaizen gatza eta piperra ere.
Horiek guztiak, baina, ez ziren aski izan. Luzapenean Realak bigarren gola egin zuen, beste penalti baten bidez. Gauzak horrela, gorritxoen hurrengo partidua ligakoa izanen da. Igandean, arratsaldeko ordu bietan, Getaferen aurka ariko dira, Sadarren.
