Azkenean, Saudi Arabiako agintariek, Espainiako Futbol Federazioak, Madril aldeko hedabideek nahi zutena bete zen Al Awwal futbol zelaian: Barcelona Osasunari gailendu zitzaion.
Berrikuntza ugaridun hasierako hamaikakoa osatu zuen Jagoba Arrasatek: bosteko defentsa, Iker Muñoz euskarri moduan, Arnaiz hasieratik. Taldeak oso partida txukuna egin zuen, hainbat aukera garbi sortuz, 59. minutuan, Lewandoskik talde kataluniarraren lehen gola erdietsi zuen arte.
Jokaldi polemikoa izan zen, Christensenek Arnaizi baloia kentzerakoan falta egin zuela salatu baitzuten gorritxoek. Falta zalantzazkoa izan liteke, baina argi dago epaileak irizpide ezberdina erabili zuela batzuen eta bestetzuen sarrerak epaitzeko tenorean.
Goletik aurrera, Barçak baloia bereganatu zuen, eta gorritxoek, aldiz, iparra galdu zuten. Luzapenean, Yamalek bigarren gola sareratu zuen.
Burua tente, Osasuna Euskal Herrira itzuliko da orain, asteazkenean, ilunabarreko bederatzietan, Kopako zortzirenetako euskal derbia jokatzeko Sadarren, Realaren aurka.
