Iruñeko zentsura mozioak PSNren etorkizun elektoralean eduki dezakeen eraginari buruz asko idatzi eta esan da azken egunotan. Bertako zein Espainia aldeko hainbat hedabideren arabera, Asiron alkate bihurtzeak barne tira-bira handiak eragin ditu alderdi sozialistaren baitan.
Konparaziora, gaur Diario de Navarak lau zutabera zabaltzeko dio “PSNk Iruñean EH Bildurekin hitzarmena lotuz gauzaturiko norabide aldaketaren aurka daudela alderdiko historikoak”. Azpititularrean irakur daiteke Nafarroa Garaiko UGTko idazkari nagusi ohi Miguel Angel Anzizarrek alderdia utzi duela.
Haatik, PSNk berak dio abenduaren 28tik altak gehiago izan direla bajak baino, Ibai Ferndandezek Diario de Noticiasen jaso duenez. Zehazki, bi pertsonak utzi diote alderdiko militante izateari. Baina, halaber, zazpi lagunek egin dute karnet sozialista lehendabizikoz.
Bestalde, Sarasate pasealekuko egoitzan diote prentsari alderdia utziko duela esan badio ere, Anzizarrek oraindik ez diela baja eskatu. Anzizarrek, bere garaian, UPNren eta PSNren arteko akordioen alde egin zuen.
