Koordinazio lan oso baten emaitza da protokoloa. "Emakumeen, nerabe zein neskatoen behartutako ezkontzak amaitu daitezen", azaldu du Begoña Alfaro kontseilariak. Gizarte arlo guztietan izanen du eragina: hezkuntzan, osasun, gizarte, justizia eta polizia eragileak koordinatuko ditu behartutako ezkontzak detektatu eta sahiesteko. Arreta berezia ezarriko da 18 urtetik beherakoengan. Protokoloak behar bati erantzunen diola esan du Alfarok: ezkontza behartuen aurrean nola jardun behar den zehaztea.
Behartutako ezkontzak ekidin nahian eta hala gertatu badira zer nolako erantzuna emateko protokoloa ezarri du Nafarroak. Lau arlo hartuko dituzte kontuan: prebentzioa, ezkontza behartu horiek izan badira detektatzea, emakumeei arreta eta babesa eskaintzea eta azkenik, justiziaren bideko arreta. Horretarako baliabideak izanen dira eskura: 30 baliabide eta profesional jarriko dira lan hori egiten.
Nafarroan ere errealitate hori badela ezagutarazteko gaur arratsaldeko zazpi terdietan Ez, ez dut nahi izeneko pelikula emanen dute Golem Baiona aretoan. Ezkontzera behartutako lau emakumeren testigantzak jasotzen dituzte dokumentalean. Belen Santos zuzendaria ere izanen da bertan eta baita dokumentalean agertzen den biktimetako bat ere.
