Zaintza hautu bat ere izan daiteke: "Zaintzari eskaintzen ari gara gure denbora ekonomikoki posible dugulako eta erabaki dugulako haien ondoan egon nahi dugula hazi eta hezteko", azaldu du Maitane Irurtzunek. 2019an izan zuen lehen alaba eta orduan haren aitak hartu zuen Libe zaintzeko baimena. Orain, 2022an izandako semearekin amak hartzea erabaki dute: "Aukera hori egiteak badakar sakrifizio bat: profesionalki nire garapena albo batean utzi dut tarte batez", azaldu du.
Zaintza bizitzaren hasieratik eta amaieraraino beharko dugula gizakiok argi dagoela dio Irurtzunek. Hartara azaroaren 30ean asko dago aldarrikatzeko: "Hezkuntza alorrean egin behar diren aldaketak asko dira", uste du. Izan ere, zaintza lanak horren feminizatuak nahi ez baditugu txikitatik erakutsi behar da denon ardura direla: "Hezkidetza eta baloreak landu behar dira haurretatik hasita. Baina ez hori bakarrik: administraziotik ere zaintza ahalbidetzeko aldaketa asko etorri behar dira", dio. Aldaketa oinarritik hasita etorriko dela iruditzen zaio.
Entzun Maitane Irurtzuni Euskalerria Irratian egindako elkarrizketa argazkian klik eginda.
