Sektore eolikoa babesteko diru-laguntza sorta prestatu du Europar Batasunak. Gaur bertan emanen du horren berri 20 orrialdeko txosten baten bitartez. Energia berriztagarria ekoizten duten enpresei 1.400 milioi euroko diru-laguntzak banatuko dizkie Europako Batzordeak eta enkante sistemaren diseinua hobetzea ere izanen du xede. Siemens Gamesa enpresak iragarri zuen joan den astean "kinka larrian" zegoela eta beharrezkoa zuela "babes ekonomikoa" aurrera egin ahal izateko. Hortaz, Europatik iritsitako albistea lagungarri izanen zaio Nafarroan dauden 1.800 lanpostu mantendu ahal izateko. Siemens Gamesaz gainera Vestas, Nordex eta Acciona ere izanen dira diru-laguntza hori jasoko dezaketen enpresak.
Lehia "desleialari" aurre egitea
Europako Batzordeak osatu duen txostenean diru-laguntzak emateko proposamenaz gainera enkanteetan izaten diren lehia desleialari aurre egiteko plana ere jaso du. Neurriak iragarriko dituzte sektore eolikoa erakargarria izateko eta modu horretara Europaz haragoko beste herrialdeetako inbertsioak ahalbidetzeko. Txinatik iristen ari den lehiari aurre egiteko mekanismoak ere ezarri nahi ditu Europak.
