Bi aste aski izan dira zuzendaritzak eta UGTk eta CCOOk akordio batera iristeko. ELA, LAB eta CGT sindikatuak adostutakoaren aurka azaldu dira. Alta, UGTren eta CCOOren artean Lan Batzordeko 31 ordezkarietatik 21 dauzkate. Hartara, oso litekeena da aurreakordioak aurrera egitea. Ezin ahantzi daiteke historikoki sindikatu jakin batzuetako kide izatea erabakigarria izan dela Volkwagenen lanpostua lortzeko tenorean.
Zuzendaritzak eta bi sindikatu nagusiek loturikoa hamargarren lan hitzarmena izanen da eta hiru urtez izanen da indarrean, 2026ra arte. Aurreakordioan, enpresak hitz ematen du 2026tik aurrera egungo enplegu maila berreskuratuko duela.
Bitartean, pizgarridun irteerak, 60 urtetik gorako langileentzako borondatezko bajak eta aldi baterako lan erregulazio txostenak erabiliko dituzte, elektrifikazioak eragindako lan zama murrizketari aurre egiteko.
Soldatak Kontsumorako Prezioen Indizearen arabera gaurkotuko dituzte. Halaber, errendimendu pertsonalaren saria 200 eurokoa izanen da 2024an, 300ekoa 2025ean eta 400ekoa 2026an.
Bestalde, zuzendaritzak onartu du baja arruntak osasun sistema publikoak kudeaketa, azken hiru urteotan zeregin hori mutua pribatuen esku izan eta gero.
