Xabier Alkuaz da Nafarroako Udal eta Kontzejuen Federazioko presidente berria. Tafallako alkateak 755 boto lortu zituen ostiraleko batzarrean, UPNko Alejandro Toquerok baino 312 gehiago. PSNko eta Geroa Baiko kideen babesa jaso zuen, eta ziurtatu zuen "ahalik eta kontsentsu handiena" bilatuko duela.
Euskalerria Irratian ere mintzatu da Alkuaz: "Erronka ez da nolanahikoa, baina saiatuko naiz gainerako erakundeekin eta eragileekin ahalik eta gehien iristen adostasunetara". Landa eremukoak dira udal eta kontzeju ugari: "Azken urteotako arazo nagusietako bat da askoren artean despopulazioarena. Baliabideak ematea eta problematikari irtenbideak bilatzea izanen dira lehentasunetako batzuk", adierazi du Alkuazek.
Aniztasunari erantzuna emateko prest
Nafarroako Gobernua aurrerakoia izanda "ildo hori" segituko du baita Udal eta Kontzejuen Federazioak ere Alkuazen esanetan. "Aniztasunari erantzuna ematen ahalegunduko gara eta hori guztion artean erdietsi nahiko nuke", dio. "Ilusioz" eta "arduraz" ekin dio bere bide berriari Alkuazek Udal eta Kontzejuen Federazioko presidentetzan. Erronka politikoa bai, baina pertsonala ere badela esan du.
Entzun hemen elkarrizketa osoa:
