"Herritarren bizitza hobetzeko eta bereziki Nafarroako herritarren beharrei erantzuna emateko lanean segituko dut", esan du Uxue Barkosek Nafarroako Parlamentuan Senatari izendatu berritan. Osoko bilkuran izendatu dute Nafarroako senatari. Bi hautagai ziren: Barkos eta UPNko Juan Jose Etxeberria. Gobernu akordioari men eginez, PSN, Geroa Bai eta Zurekin Nafarroa taldeen babesa jaso du Barkosek, 21 boto. Etxeberriak, berriz, UPNren eta PPren 18 botoak jaso ditu. Boto zuria eman dute EH Bilduk eta Voxek.
Etapa berria hastear
Koldo Martinezen lekukoa hartuko du Barkosek Madrilen, hura izan baitzen Nafarroako senatari autonomiko joan den apirilera arte. "2004ko indar berarekin helduko diot erronkari, eta Nafarroako politikaren lehen lerroan segituko dut era berean", adierazi du Barkosek.
