Larunbatean Ager Txiki eguna eginen da Tafallan. Errigoratik sortutako Agerraldi ekimenak euskararen sustapena du helburu Nafarroako erdialde eta Erriberan. Agerraldiak bultzatuta aurten ager eremuko hogei bat herritan abiatuko dira euskarazko ludotekak eta hauen aurkezpena egingo dute larunbatean.
Urritik aurrera ikasturte guztian izango dira martxan jolastekak eta hauek aurkeztean gain, larunbatean bertaratzen diren haurrek Porrotx pailazoa ezagutuko dute, Dindaiaren eskutik tailerrak eta jolasak izango dituzte eta Gure Zirkuaren emanaldiaz gozatzeko aukera izango dute; guztiak euskaraz bizitzeko espazioa irekiz.
Haizea Lizarbe Agerraldiko kideak Ager Txikiren helburua azaldu digu: "euskara baliagarria dela eta beste haur batzuekin euskaraz egin dezaketela erakutsi nahi dugu". Bestalde, haurrak "beste haur batzuk zeinekin euskaraz jolastu dezaketen" ikustea da xede. Bestalde, hilaren 30ean Ablitasen eginen da Errigoraren auzolan saio handia kanpaina berrirako saskiak prestatzeko. Eta, euskararen aldeko beste ekimenen artean, urriaren 1ean Santxikorrota lasterketa eginen da Bardeetan. Gero eta mugimendu handiagoa aurten 10 beteko dituen Errigora ekimenaren inguruan.