Alfonso Perez futbol zelaian puntuak urratzea nekeza da. Defentsan, eta bereziki geldikako jokaldietan, horren biguinak izanda, ezinezkoa. Getafek buruz egin zizkion hiru golak Osasunari. Horietako bi, kornerretan.
Hasieran Osasuna gehiago izan zen. Alta, eraginkortasun handiagoz, Bordalasen taldea bi aldiz aurreratu zen markagailuan, eta beste horrenbestetan berdindu zuen Osasunak, Budimirrek, penaltiz, eta Iker Muñozen, korner batean, sarturiko golei esker. Haatik, 86. minutuan Maksimovicek hirugarrena sartu zuen, beste behin ere korner batean.
Muñozek partidu bikaina egin zuen, baina aurkako goletako batean markan huts egin zuen. Herrando ere txukun aritu zen, baina berak ere kale egin zuen kontrako goletako batean. Agian eskarmenturik eza sumatu zitzaien. Apika horixe da jokalari gazteekin jokatzeagatik ordaintzen den prezio garestia.
Jagoba Arrasate haserre azaldu zen, norgehiagokaren amaieran: “Ongi jokatu dugu, baina gaizki lehiatu gara”. Ez da laburpen txarra.
Jokalariek gaur entrenamendua izanen dute Taxoaren. Bihar, jai. Larunbatean laurak eta laurdenetan, Sevillaren aurka jokatuko dute, Sadarren.