Etxera joan behar izan zuten erasoaren ondotik ez zirelako jai horien baitan seguru sentitzen. Hala jakinarazi du Arraiozko festetan lasai zebilen lagun taldeak. Gizonezko batzuk ahozko erasoa egin zieten. Jakinarazi dute gainera, ez dela kasu bakana izan, aurretik ere jasan izan dituztelako irainak, mehatxuak edo begiradak.
"Badakigu holako jarrerekin gu isilarazi nahi gaituzuela, ezkutatu nahi gaituzuela eta berriz ere bazterrera bidali nahi gaituzuela, klandestinitatera. Baina argi eta ozen diogu: ez duzue lortuko, gure artean babesturik eta sareturik baikaude", esan du lagun taldeak. Berretsi dute lanean jarraituko dutela, "festa eta inguru plural, aske eta errespetutsua" izan arte.
