Musikariak Ikastetxeetan programa bertan behera utzi du Nafarroako Hezkuntza Departamentuak. Joan den ostiralean, hilak 23, Hezkuntza Zuzendaritza Nagusiak posta elektroniko bidez jakinarazi zion programa kudeatzen duen Dijitalidadea enpresari ez zuela kontratua luzatuko, eta hartara egitasmoa 2023-2024 ikasturtean bertan behera utziko zuela, erabakiaren zergatiaren inguruko inolako azalpenik eman gabe.
Programa horren eskutik, euskal musikariek Nafarroako A eta D ereduetako ikastetxeetara euskal kultura daramate ikasleekin topaketak eginez, haiekin sormen prozesuaz mintzatuz eta musika zuzenean joz. Esku hartu duten ikastetxe guztiek hurrengo ikasturteetan berriro egin dute, irakasleen zein ikasleen balorazioa oso ona izan baita beti.
Egitasmoa 2018an jarri zuten martxan. Elhuyar Fundazioko koordinatzaile Jon Abrilek ekimena goretsi du Twitterren: "Aitzindaria izan zen Nafarroako Gobernua programa honekin, sortzaileak ikasgelan sartuz. Kulturaren transmisioak horrelako programa gehiago behar ditu".
LAB sindikatuak azalpenak eskatu ditu ohar baten bitartez: “Hezkuntza Departamentuari exijitzen diogu lehenbailehen eman ditzala egoera horren inguruko azalpenak. Halaber, euskararen kontrako erasoek jarraitzen duten bitartean aurrean izango gaituela argi utzi nahi dugu berriz ere”.
“D ereduko ikastetxeak babesik gabe geratu dira”
Euskara Ataleko buru ohi Marian Antoñanak Twitterren gogor kritikatu du erabakia: “Euskararen etsai porrokatuak zarete, Hezkuntza Departamentua eta Maria Txibite”, idatzi du.
Euskararen etsai porrokatuak zarete.@educacion_na@mavichina
— Marian Antoñana (@marianantonnana) June 27, 2023
"Hezkuntza departamentuari exijitzen diogu berehalakoan eman ditzala “Musikariak ikastetxeetan” programa bertan behera utzi izanaren arrazoiak" https://t.co/xRkinJHJAE via @LAB sindikatua Hezkuntzan eta Irakaskuntzan
Nolanahi ere, Eleaniztasun Zerbitzuaren funtzionamenduaren aurkako kritikak ez dira berriak eta ez dira Musikariak Ikastetxeetan egitasmora mugatzen. LAB sindikatuak berak maiatzaren 19an karrikaraturiko ohar batean salatu zuen Ignacio Catalan zerbitzuburua Euskara Atala edukiz husten ari zela: “Zuzendaritzak aspalditik erakusten duen euskararekiko mesprezuak lanpostu tekniko batzuk kentzea ekarri du, eta orain, horri gehitu behar zaio geratzen zen lanpostu tekniko bakarra ataletik kanpo atera dutela”.
Sindikatuaren arabera, “D ereduko ikastetxeek aholkularitza eta laguntza ona zuten orain arte, Euskara Ataleko langileen ezagutza profesional handiari esker, baina azken aldaketa horien ondorioz, gaur egun batere babesik gabe geratu dira”.
“Zerbitzuburuak menpeko langileak txikitzen ditu”
Euskara Ataleko teknikari ohi Ana Unanue Serranok Twitterren salatu duenez, “Catalan ez da ez euskaltzalea ez euskarafoboa: bere nagusiek agintzen diotena da. Eta bere menpekoak matxakatzen ditu, errukirik gabe”.
LAB sindikatuak bat egiten du salaketa horrekin. Maiatzeko oharrean gogor kritikatu zuen Catalanen jokaera, zehazki, “errespetu-faltak, arbitrariotasuna eta gaitzespen publikoak, bere menpeko langileen aldartean, osasunean eta lan egiteko moduan eragina dutenak”.
LABen arabera, jokaera hori “guztiz autoritarioa” da: “Ez du biderik ematen taldearen ekarpenak, iritziak, irizpide desberdinak edo proposamenak jasotzeko. Langileek jasotzen duten tratuak ere ez ditu pertsonen arteko harreman onak sustatzen, elkarri laguntzea mugatzen duelako eta diskriminazioa eragiten duelako gune edo elementu komunitarioak erabiltzeko orduan”.
LABen arabera, Euskara Ataleko langileek Prebentzio Atalak egindako Arrisku Psikosozialen Ebaluazioan parte hartu dute, eta emaitzak guztiz kezkagarriak izan dira.
Amorante tronpetan, Jon Gurrutxagaren musika, letra, ahotsa eta gitarra. Txikia handi: ederra benetan. Nafarroako Hezkuntza Departamentua punta-puntako agertoki bihurtuta. Gora #MusikariakIkastetxeetan pic.twitter.com/n9DgSWdKO5
— Ana Unanue Serrano (@bizipox) July 2, 2019
