Ostalaritzaren sektorean gehiengoa osatzen duten UGT eta CCOO sindikatuek lan hitzarmen aurreakordioa sinatu dute patronalarekin. UGT sindikatuak prentsa ohar baten bitartez jakinarazi duenez, aurreakordio horrek atzera begirako eragina izanen du, eta %4ko soldata igoera finkatzen du 2022rako, %4koa 2023rako, %3koa 2024rako eta %3koa 2025erako. Baldin eta lau urteotan azkenean Kontsumorako Prezioen (KPI) Indizea egiazki %14 baino gehiago hazten bada, akordioa berrikusiko da, eta %17ra arteko igoera egin liteke.
Soldata igoeraz landara, UGTk, CCOOk eta patronalak fitxaketa elektronikoa egiteko sistema baten ezarpena adostu dute, ordaindu gabeko aparteko orduen aurkako neurri moduan. Horretaz gain, kategoria langileak sektorean duen antzinakotasunaren arabera kalkulatuko da, tartean enpresa aldaketak izanagatik ere.
ELA eta LAB, kontra
ELA eta LAB sindikatuek akordioa kritikatu dute, haien aburuz ez duelako KPIaren egiazko igoera bermatzen. “Patronalak aitortu du langileen mobilizazioak eraman dituena haien jarrera gotortua aldatzera. Oraindik denbora eta edukia falta zen akordio on batera iritsi ahal izateko”, salatu du LABek prentsa ohar baten bitartez.
“Arazoa da akordioak ez duela KPIaren araberako igoera bermatzen; izan ere, datozen urteotan KPIaren igoeran %17a gainditzen badu, soldatak ez dira neurri berean igoko”, gaineratu du sindikatuak.
