Guztira 3.822 ikaslek egingo dute Nafarroako Unibertsitate Publikoan, garai batean selektibitatea izan zen Unibertsitatean Sartzeko Ebaluaketaren azterketa bihar hasi eta ostegunera bitarte, Arrosadiko campusean (Iruñea) eta Tuteran.
Horietatik %58 emakumeak (2.224) izanen dira eta laurdena pasak (%25,51) euskaraz eginen dituzte haien azterketak. Azterketa eredua iazko bera izanen da eta pandemia aurretik egiten zen ohitura berreskuratuko dute Iruñean, azterketak ikasgelategiaren eraikinean eginen baitituzte.
Probak bihar 09:30ean hasiko dira, Gaztelania eta Literatura azterketarekin, eta 12:00etan Historia azterketarekin. Arratsaldean, probak 16:00etan hasiko dira, ingelesarekin, eta 18:30ean frantseseko eta alemaneko azterketak egingo dira.
Asteazkenean, goizeko 8:30etan hasiko da bigarren jardunaldia A eta D ereduko Euskara eta Literatura II probekin. 11:00etan Matematika II, Latina II eta Artearen Oinarriak II azterketak eginen dituzte ikasleek. Arratsaldean, 15:00etan, Gizarte Zientziei Aplikatutako Matematika eta Marrazketa Teknikoa II probak izango dira, eta, ondoren, 17:30ean, Biologia, Enpresaren Ekonomia eta Arte Eszenikoetako azterketak.
Probak ostegunean, ekainaren 8arekin, amaituko dira, Filosofiaren Historia 08:30ean eta Fisika, Grekoa II eta Ikus-entzunezko Kultura II azterketak 11:00etan. Azkenik, 15:00etan Kimika eta Artearen Historiako probak egingo dituzte eta 17:30ean Geologia, Geografia eta Diseinukoak.
Ohiko deialdiaren emaitzak ekainaren 14an ezagutu dituzte eta kalifikazio-txartela hil horren 21etik aurrera deskargatu. Bestalde, ezohiko deialdiko azterketak ekainaren 28an, 29an eta 30ean egingo dira, eta, kasu horretan, emaitzak uztailaren 4an izango dira eskuragarri.