Sanchezek uztailaren 23ra aurreratu ditu hauteskundeak, San Fermin egunean hasiko da kanpaina

Euskalerria Irratia 2023ko mai. 29a, 18:20
Pedro Sanchez hauteskunde orokorren deialdia iragarri duen agerraldian.
  • Bihartik uztailaren 13ra bitartean posta bidezko botoa eskatu ahal izango da.
  • Ekainaren 9an bukatuko da hauteskunde-koalizioak jakinarazteko epea. 

Espainiako presidenteak udazkenean egitekoak ziren hauteskundeak aurreratu eta hauteskundeetara deitu du uztailaren 23an, atzo izandako hauteskunde autonomiko eta munizipalen emaitzen ostean. Ministroen Kontseiluak gaur arratsaldeko bileran onartu du Gorteak desegiteko eta uztailaren 23ko hauteskunde orokorrak deitzeko dekretua eta bihar bertan argitaratuko dute Espainiako Estatuko Aldizkari Ofizialean. Hala, uztailaren 7an San Fermin egunean hasiko da hauteskunde kanpaina eta 21ean bukatuko da; sanferminetako bederatzi egunetatik zortzi hartuko ditu. Hauteskunde-koalizioak jakinarazteko epea ekainaren 9a izango da eta ekainaren 19an amaituko da probintziako hauteskunde-batzordeetarako Kongresurako eta Senaturako hautagaitzak aurkezteko epea.

PSOEk hiru puntugatik galdu zituen udal hauteskundeak igande honetan PPren mesedeetan, eta orain arte zuen lurralde boterearen zati handi bat galdu zuen, agintean zeuden bederatzi erkidegoetatik sei galduta. PPk hainbat autonomia erkidegotako gobernua kendu ahal izango dio PSOEri, baina gehienetan Voxen babesa beharko du. Hala ere, alkateen eta erkidegoetako presidenteen kudeaketa goraipatu du Sanchezek, eta horietako askok botoetan gora egin dutela nabarmendu du, nahiz eta garaipena PPrentzat izan.

Hauteskunde orokorretarako posta bidezko botoa eskatu ahal izango da maiatzaren 30etik uztailaren 13ra arte. Norberak pertsonalki nortasun-agiri nazionala aurkeztuta eskatu beharko du posta bidezko botoa eta uztailaren 19a baino lehen ziurtaturik bidali beharko da. Eskabide-inprimakia Barne Ministerioaren webgunean deskarga daiteke, eta bide telematikoz Correosen web-orrian edo bulego batera bertaratuta aurkeztu.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!