Geroa Baik memoria izan du hizpide gaurko hauteskunde ekitaldian. Biktima guztiak aintzat hartzea, terrorismoaren biktimen lege berria eta sekretu ofizialen legea aldatzea mahai gaineratu dituzte Uxue Barkos zerrendaburu eta Ana Ollo kontseilariak
Memoria historikoa eta elkarbizitza izan dira hizpide Media Luna parkean den Atxilotze zentroen oroitarrian.
Belaunaldi berriak "aurreko belaunaldiak hazi diren desmemorian haztea eragotzi behar da", nabarmendu dute, ahanzturarekin batera bidegabekeria eragiten duelako horrek.
Terrorismoaren biktimen foru lege berri bat eskatu du Geroa Baik, " terrorismoaren biktimak daudelako, baita ETArenak ere” nabarmendu du aldiz Ollok, “hamarkadetan zehar Nafarroan gutxietsiak izan direnak", edo sekretu ofizialen legea aldatzea, "Mikel Zabalzaren kasua bezalako kasuak ikertzea eragozten duena".
Memoria historikoa etorkizuneko balio gisa aldarrikatu dute sozialberde eta jeltzaleen koaliziotik.
Gainera, Ollok gaineratu duenez, "polizia-indarkeriaren eta funtzionario publikoen indarkeriaren biktimen errekonozimenduan aurrera egiten jarraitu behar da, Errekonozimenduaren Erreparaziorako Batzordeari bultzada emanez", eta "egia eta justiziarako eskubideetan aurrera egiten jarraitu behar da, biktimagileen ezagutzarekin".
Ohartarazi dute eskuin-muturraren diskurtsoak hedatzen hasiak direla Nafarroan eta horiek elkarbizitzarako oztopo direla. Horregatik, Geroa Baik proposatu du memoriaren eta bizikidetzaren bigarren plan estrategikoa bultzatzea, Nafarroa anitza ideologian, identitatean, hizkuntzan, kulturan, arrazan, sexu eta genero identitatean aintzatesteko bidean aurrera egiteko.
