Alderdiek gaur hasi dute kanpaina Iruñean eta Espainiako Ikerketa Soziologikoen Zentroaren (CIS) inkestaren arabera hauteskunde aurreko galdeketak egungo eszenatokiaren antzekoa aurreikusten du Nafarroan, maiatzaren 28ko hauteskundeen ondoren. CISen iragarpenaren arabera UPNk garaipena lortuko du nahiz eta hauteskundeetan atzera egingo duen; 10-13 eserleku bitartean lortuko lituzke.
Akats marjina kontuan izanda inkestak emaitza zabalak eskaintzen ditu eta interpretaziorako tartea egongo da, izan ere, lau alderdi egon daitezke lehen indar politikoa izateko lehian. PSNk 9-12, Geroa Baik 8-10, EH Bilduk 8-10, PPk 5-6, Zurekin Nafarroak 2-4 eta Voxek 2-3 eserleku eskuratuko lituzke Foru Parlamentuan CISen arabera. Hortaz, UPN, PSN, Geroa Bai eta EH Bildu indar nagusia izan daitezke. Nolanahi ere, badirudi UPN izango dela lehenengo postuan geratuko dena atzerapauso handia eman arren.
Boto-asmoari dagokionez, UPN egongo litzateke lehenengo postuan % 21,5ekin. Ondoren, PSN (% 18,8), hirugarren Geroa Bai (% 16,6) eta laugarren EH Bildu (% 15,9). PPk berriz, % 10,8 lortuko luke, Zurekin Nafarroak % 6,3 eta Voxek % 5. Hala ere, CISek agertoki irekia aurreikusi du, izan ere, bozkatuenen artean hauek izan daitezke estimatutako tarteak: %17,9 - % 25,2 artean Javier Esparza, UPN; % 15,3 - % 22,2 artean María Chivite, PSN, % 13,3 - % 19,9 artean Uxue Barkos, Geroa Bai; eta % 12,6 - % 19,1 artean Laura Aznal, EH Bildu.
Atzetik, Javier García, PP (% 8,1 - % 13,6 artean); Begoña Alfaro, Zurekin Nafarroa koalizioa (% 4,1 - % 8,4 artean); eta azkenik Maite Núñez, Vox Parlamentuan sartzeko % 3 gaindituko lukeela (% 3,1 – % 7,0 artean).
2019ko hauteskundeetan Navarra Sumak 20 parlamentari izan zituen, PSNk 11, Geroa Baik 9, EH Bilduk 7, Ahal Duguk 2 eta Izquierda-Ezkerrak 1.
