Gero eta gutxiago falta da bihar 22:00etan Osasunaren eta Real Madriden arteko Kopako final handia hasteko. Eta partida bertatik bertara gozatu ahal izateko, 25.000 Osasuna zale bidaiatuko dira Iruñetik Sevillara. Bart lehenak iritsi ziren Andaluziako hiriburura, beren elastikoekin haren karrikak gorriz tindatzen hasteko.
Autobus gidarien lan gatazka konpondurik eta haien asteburu honetarako greba deialdia bertan behera geratu eta gero, atzo arratsaldean lehen busak atera ziren euskaldunon hiri buruzagitik Andaluziako hiribururantz. Guztira 150 izanen dira bidaia hori eginen duten mota honetako ibilgailuak.
Sanduzelaiko tren geltokian ere Osasunaren elastikodun bidaiariak ikusi ziren atzo. Guztira 15 tren berezi antolatu dituzte haientzat.
Esan gabe doa, milaka zalek bidaia autoz eginen dutela. Edo autokarabanaz. Atzo 20 abiatu ziren Sadar paretik 18:30ean. Sevillan guztira 200 elkartuko dira.